Արժույթի միջազգային հիմնադրամի նախկին ղեկավար Դոմինիկ Սթրոս Կանի դեմ Ֆրանսիայում նոր հայց է ներկայացվել, հաղորդում է ՏԱՍՍ-ը՝ վկայակոչելով տեղի լրատվամիջոցները:
Հայցը ներկայացրել են 60-ամյա ինժեներ Ալեն Յուրբաշն ու նրա կինը: 2014-ի օգոստոսի վերջին զույգը 1,14 մլն եվրո է ներդրել Leyne, Strauss Kahn & Partners ֆինանսական ընկերության կապիտալը մեծացնելու գործարքում: Ընկերության համահիմնադիրներից մեկը Սթրոս Կանն է:
Յուրբաշ ամուսիններն ընդգծում են, որ LSK-ի ղեկավարությունը, որը դիմել է իրենց կապիտալ ներդրում անելու առաջարկով, գործել է կեղծ մեթոդներով՝ թաքցնելով իրերի իրական վիճակը, եւ ընկերությունը մի քանի ամիս անց սնանկ է ճանաչվել (նույն թվականի նոյեմբերին):
LSK-ի սնանկացման հետեւանքով Յուրբաշներն ամբողջությամբ զրկվել են ներդրված միջոցներից: Սթրոս Կանից վճարում են պահանջում նաեւ 156 այլ ներդրողներ, որոնք ապրում են տարբեր երկրներում: Նրանք մտադիր են հասնել նրան, որ վերադարձվեն իրենց 100 մլն եվրոյի ներդրումները: