Արագածավան գյուղում փետրվարի 3-ի լույս 4-ի գիշերը տեղի ունեցած սպանության վերաբերյալ NEWS.am-ին նոր մանրամասներ են հայտնի դարձել. վիճաբանությունը ծագել է խոտի դեզի պատճառով:
Նախնական տեղեկությունների համաձայն` սպանված Արտյոմ Խամոյանը, Վարդգես Գալստյանը, եւ վիրավոր Արման Խամոյանը, որն Արտյոմի եղբայրն է, գնացել են ձերբակալված Սեդրակ Ղազարյանի տուն եւ նրան մեղադրել իրենց խոտի դեզն այրելու մեջ: Կողմերի միջեւ վիճաբանություն է ծագել, որը վերածվել ծեծկռտուքի:
Այդ ընթացքում Սեդրակ Ղազարյանը մտել է տուն, բերել զենքը եւ կրակոցներ արձակել: Տեղում ոչ ոք չի մահացել: Երեքին էլ տեղափոխել են գյուղի ամբուլատորիա, որտեղ Վարդգես Գալստյանը մահացել է: Մյուս երկուսին տեղափոխել են Թալին քաղաքի հիվանանոց, որտեղ մահացել է նաեւ Արտյոմ Խամոյանը, իսկ Արման Խամոյանն այս պահին հիվանդանոցում է գտնվում:
Կրակոցներից հետո, ուշ գիշերին կողմերի հարազատները սկսել են հաշվեհարդար տեսնել միմյանց նկատմամբ: Ողջ գյուղը եղել է ծայրահեղ լարված վիճակում: Ոստիկաններն ու քննիչները նշված գյուղում կեսգիշերն անց հայտնաբերել են «Ford Transit», «Mercedes» եւ «Ժիգուլի» մակնիշի ամբողջովին վնասված ու ջարդված ավտոմեքենաներ, ապա նաեւ ամբողջովին ջարդված եւ վնասված «Նիվա» մակնիշի ավտոմեքենա:
Այս պահին գյուղում դեռ շարունակվում է լարված իրավիճակը, ըստ գյուղացիների` ամեն վայրկյան վրեժխնդրության վտանգ կա: Անվտանգության նկատառումներից ելնելով Արագածավանում են գտնվում բազմաթիվ ոստիկաններ: Դեռ օրեր շարունակ նրանք կհսկեն գյուղի անվտանգությունը:
Ավելի վաղ NEWS.am-ը հայտնել էր, որ փետրվարի 3-ին ժամը 23.45-ին հիվանդանոցից ոստիկանության Թալինի բաժնում հաղորդում է ստացվել, որ շտապօգնության ավտոմեքենայով իրենց մոտ է տեղափոխվել 40-ամյա Արտյոմ Խամոյանի դիակը եւ 32-ամյա Արման Խամոյանը՝ հրազենային վնասվածքներով:
Դեպքի վայր մեկնած օպերատիվ խումբը պարզել է, որ նույն օրը ժամը 23:00-ի սահմաններում Արագածավան գյուղի Հոկտեմբերյան խճուղու թիվ 33 շենքի բակում տեղի ունեցած վիճաբանության ժամանակ 35-ամյա Սեդրակ Ղ.-ն իրեն պատկանող «ՖԱԲԱՐՄ» տիպի, 12 մմ տ/չ ողորկափող որսորդական հրացանից կրակոց է արձակել, ինչի հետեւանքով Արտյոմ Խամոյանը եւ 49-ամյա Վարդգես Գալստյանը մահացել են, իսկ Արման Խամոյանն ստացել է մարմնական վնասվածքներ:
Փետրվարի 4-ին, ժամը 01.00-ին, Սեդրակ Ղ.-ն բերման է ենթարկվել բաժին: