Հայաստանում անհրաժեշտ է վերամշակող ընկերություններին արտոնյալ վարկեր տրամադրել, որպեսզի զարգանա Հայաստանի գյուղատնտեսությունը: Այս մասին այսօր` փետրվարի 4-ին, լրագրողների հետ հանդիպմանն ասաց ԲՀԿ-ական պատգամավոր Լյովա Խաչատրյանը` նշելով, որ Հայաստանի տնտեսության զարգացումը կապված է գյուղատնտեսության զարգացման հետ:
«Գյուղատնտեսությանն ուղղված է եղել վերցված ընդհանուր վարկի 8-9 տոկոսը, երբ գյուղատնտեսությունն այսօր այն ոլորտն է, որը տնտեսական աճ է ապահովում երկրում: Այսօր ռուսական, եվրոպական շուկաները բաց են, բայց մենք չունենք ապրանք, որ կարողանանք արտահանել: Բավականին մեծ քանակի մոզի է արտահանվել այս մի քանի ամսվա ընթացքում, բայց այդ արտահանումը դադարեցվեց, որովհետեւ արտահանման ենթակա մոզի չկա այլեւս: Երբ սա լինի կանխատեսելի եւ համակարգված, գյուղացին կսկսի զարգացնել նաեւ այս ոլորտը»,-ասաց պատգամավորը:
ՀՀԿ-ական Լեռնիկ Ալեքսանյանն էլ նշեց, որ Հայաստանում գյուղատնտեսության ոլորտն ամենածանր բնագավառն է եւ կան շատ խորքային խնդիրներ, որոնց լուծման համար անհրաժեշտ են ռազմավարական, իրավիճակային լուծումներ:
«Գյուղատնտեսության վրա մեծ ներդրումներ պետք է արվեն, այսօր գյուղացին վարկ է վերցնում, սակայն չի կարողանում դրա տակից դուրս գալ: Գյուղացին ավելի լավ է չզբաղվի գյուղատնտեսությամբ, քան մնա վարկերի տակ, դրա համար պետք է գյուղատնտեսության համար հայեցակարգ մշակվի, իմանանք, թե որ գյուղատնտեսական արտադրանք է ավելի ձեռնտու եւ զբաղվել դրա արտադրմամբ ու արտահանմամբ»,-ասաց պատգամավորը:
