Չինացի ցանցահենները հարձակվել են Alibaba Group ընկերության «ամպային» ծառայության` Taobao-ի խոշորագույն հարթակի  ավելի քան 20 մլն ակտիվ հաշվի վրա, տեղեկացնում է Gazeta-ն` վկայակոչելով Reuters-ին:

Alibaba-ի ներկայացուցիչը հայտնել է, որ մասնագետներն առաջին փուլում նկատել են հարձակումը եւ օգտատերերին դիմել են գաղտնաբառերը փոխելու խնդրանքով: Բացի այդ, ընկերությունը հետաքննության շրջանակում սերտորեն համագործակցում է ոստիկանության հետ:   

Համացանցի կառավարման չինական նախարարության տվյալներով, ցանցահեններն անցյալ տարվա հոկտեմբերից սկսել էին կիրառել այդ սխեման, ինչից հետո  նոյեմբերին բացահայտվել էին: Այս պահին չարամիտները ձերբակալված են:   

Ենթադրվում է, որ հաշիվների ջարդումը կարող էր տեղի ունենալ  Alibaba հարթակի խոցելիության հետեւանքով, բայց մամուլի քարտուղարը պնդում է, թե համակարգը հուսալիորեն պաշտպանված է: