Արդեն 14 տարի Երեւանի Պռոշյան 19 հասցեում գործող «Քարանձավ» ռեստորանի տարածքի համար պայքարող Թելոյանները հույս ունեն, որ Վերաքննիչ քրեական դատարանն էլ իրենց կարդարացնի եւ կխուսափեն քրեական պատասխանատվությունից:
«Առաջին ատյանի դատարանն ինձ, մորս ու մորաքրոջս արդարացրեց, սակայն մենք մտավախություն ունենք Վերաքննիչի հետ կապված, քանի որ մյուս կողմի լիազորված անձի՝ Գագիկ Խուդավերդյանի կինը Վերաքննիչի դատավոր Կարինե Հակոբյանն է»,- NEWS.am-ի թղթակցին ասաց Լեւոն Թելոյանը:
Ըստ մեղադրական եզրակացության՝ Վալենտինա, Լեւոն եւ Էմմա Թելոյաններն օրենքով սահմանված կարգի խախտմամբ ինքնակամ իրականացրել են իր ենթադրյալ իրավունքները, որը էական վնաս է պատճառել Երևան քաղաքի Պռոշյան 19 հասցեի սեփականատիրոջ օրինական շահերին` զրկելով սեփականության իրավունքով պատկանող գույքը տնօրինելու, տիրապետելու և օգտագործելու սահմանադրորեն երաշխավորված իրավունքից:
Թելոյաններին մեղադրանք էր առաջադրվել Քրեական օրենսգրքի 322-րդ հոդվածի 1-ին մասով: Առաջին ատյանի դատարանն արդարացրեց նրանց:
Տուժող կողմը, սակայն, համաձայն չէ արդարացման դատավճռին եւ վերաքննիչ բողոք է ներկայացրել: Առաջին նիստը կկայանա փետրվարի 19-ին:
Հիշեցնենք, որ Թելոյանները Պռոշյան 19 հասցեում գտնվող տարածքը՝ մոտ 1000 քմ, գնել են դեռեւս 90-ականների թվականներին: Ընտանիքի որդու՝ Լեւոն Թելոյանի պատմելով, 2002թ.-ին հայտնվել է դատավոր Կարինե Հակոբյանի ամուսինը՝ Գագիկ Խուդավերդյանը եւ հայտնել, որ տարածքը կտակով պատկանում է ԱՄՆ-ում բնակվող հայի:
«Այդ ժամանակ մենք մեր բոլոր փաստաթղթերը ցույց տվեցինք, մենք ունենք սեփականության վկայականը, գործարքը կատարվել է օրինական»,- պատմել է Լեւոն Թելոյանը:
Հայաստանյանը դատարանն էլ, հաշվի առնելով կտակը, տարածքը հանձնել է ամերիկահային եւ պարտավորեցրել քանդել վիճարկելի տարածքում կառուցված «Քարանձավ» ռեստորանը: Առ այսօր կառույցը չեն քանդել: Թելոյանների պնդմամբ՝ կտակը կեղծ է, իրենք նույնիսկ դատարանին ապացուցել են դա, սակայն ոչ ոք այդ փաստը հաշվի չի առել:
«Հիմա էլ մտավախություն ունենք, որովհետեւ իրենք դիմել են ՄԻԵԴ, որն էլ իր հերթին հարց է բարձրացնում, թե ինչու այս տարիների ընթացքում օտարման վճիռը չի կայացվել»,- հավելել է Լեւոն Թելոյանը: