Հայաստանում 2015 թվականի երրորդ եռամսյակի տվյալներով գործազուրկների թիվը 220 հազար մարդ է կազմում: Այդ մասին փետրվարի 4-ի մամուլի ասուլիսին հայտնել է Հայաստանի Ազգային վիճակագրական ծառայության աշխատակազմի աշխատանքի վիճակագրության բաժնի պետ Լուսինե Քալանթարյանը:
Նրա խոսքով, նախորդ եռամսյակի համեմատ այդ թիվը նվազել է 9 տոկոսային կետով եւ 8 տոկոսային կետով 2014 թվականի համեմատ: «Ընդհանուր առմամբ հարցմանը 24 – 25 հազար մարդ է մասնակցում: Աշխատաշուկայի գնահատման տեսանկյունից որպես աշխատունակ տարիք է համարվում 16 – 63-ը, իսկ ուսումնասիրում ենք 15 – 75 տարեկան մարդկանց: Դա նույնանում է մեր երկրի աշխատանքային ռեսուրսի հետ», - պարզաբանել է Քալանթարյանը: 2015-ի երրորդ եռամսյակի տվյալներով, շարունակել է նա, Հայաստանում 2,1 մլն աշխատունակ բնակչություն կա. նախորդ եռամսյակի համեմատ այդ ցուցանիշը նվազել է 2,9 տոկոսային կետով: «Հարցվածների 60 – 64 տոկոսը համապատասխանում է աշխատուժ բնորոշմանը, այսինքն այնպիսի մարդիկ են, որոնք աշխատում են եւ աշխատանք են փնտրում. նրանք, ովքեր այս կամ այն կերպ ներկայացված են աշխատաշուկայում: Իսկ աշխատանքային ռեսուրսների 37 տոկոսը կազմում են այն մարդիկ, որոնք աշխատանք չունեն եւ տարբեր պատճառներով չեն փնտրում», - ընդգծել է Լուսինե Քալանթարյանը: Տղամարդ-կին հարաբերակցության մեջ, շարունակել է նա, գործազուրկների 56 տոկոսը կազմել են կանայք, իսկ 44 տոկոսը` տղամարդիկ: «Քաղաք-գյուղ հարաբերակցության մեջ տարբերությունը բավականին մեծ է. գործազուրկների 88 տոկոսը քաղաքում է եւ ընդամենը 12 տոկոսը` գյուղերում: 2015-ի երրորդ եռամսյակի տվյալներով, գործազրկության մակարդակը կազմել է 16,6 տոկոս: Նախորդ եռամսյակի համեմատ, գործազրկության մակարդակը նվազել է», - ընդգծել է Լուսինե Քալանթարյանը: