Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի դաժան սպանության մեջ մեղադրվողների պաշտպանները դժգոհ են քննչական փորձարարության արդյունքներից եւ պնդում են, որ այն ապացույց չի կարող համարվել:
«Ռուսական ալիքով կա «Սամ սեբե ռեժիսյոր» հաղորդաշար: Չեմ կարողանում ընկալել, թե ում գաղափարն է եղել, որ սենց գործողություն կատարի քննիչը ու անունը դնի փորձարարություն: Այս փորձարարությունը զուտ նրա համար էր, որ ասեն՝ լսեք, ինչ են ասում, ոնց ա արվել»,- այսօր՝ փետրվարի 4-ին, Ավան եւ Նոր Նորք վարչական շրջանների ընդհանուր իրավասության դատարանում փորձարարության տեսագրությունը զննելուց հետո ասաց ամբաստանյալներից Նորիկ Սահակյանի պաշտպան Հովիկ Արսենյանը:
Հովիկ Արսենյանը նշեց, քննիչն ուղղորդող հարցեր է տվել: Նրա խոսքով՝ նաեւ օրենքի խախտում է այն, որ ռազմական ոստիկանության աշխատակիցներ են եղել փորձարարության ժամանակ. «Հերթական անգամ տարել, շիշն են մտցրել, պրոպկեն էլ վրան, ասել են՝ ոչ աջ, ոչ ձախ»:
Վաչե Սահակյանի պաշտպան Արմեն Նադիրյանը նշեց, որ փորձարարությունից պարզ չի դառնում, թե վկաներն ինչ դիրքով են պառկած եղել, քանի որ դա հպանցիկ է ներկայացվել:
Դատական նիստն այսօր հետաջգվեց: Հաջորդ դատական նիստին կշարունակվի ապացույցների հետազոտումը:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել:
