Հայաստանում հաճախ է պատահում, երբ ծնողն իր զավակի կողմից ընտանեկան բռնության է ենթարկվում: Այս մասին NEWS.am-ի հետ զրույցում ասաց Աննա Բադալյանը` նշելով, որ չնայած դրան, Հայաստանում պահպանվում է ծնող-երեխա ջերմ հարաբերությունները:
Հոգեբանի խոսքով, իր պրակտիկայում պատահել է, երբ հոգեբանական օգնության է դիմել տարեց տղամարդ, որը լքված է եղել իր զավակների կողմից, ըստ հոգեբանի, դա ընտանեկան բռնության տեսակ է, երբ զավակի կողմից հոգեբանական ու բարոյական ճնշման է ենթարկվում ծնողը:
«Պատահում է, երբ երեխան արդեն գալիս է ծնողի կարգավիճակում եւ իր ծնողներին դարձնում է ձայնազուրկ, նրանց ծերանոց է տանում: Այս պարագայում ծողների նկատմամբ բարոյական մոտեցում չկա եւ սա նույնպես ընտանեկան բռնության տեսակ է»,-ասաց հոգեբանը:
Աննա Բադալյանի խոսքով, մանկական հիշողությունները հետագայում դառնում են վարքի դրսեւորում. եթե երեխան ընտանիքում տեսնում է, որ իր պապիկի կամ տատիկի հետ իր ծնողը վատ է վարվում, տարիներ անց նույն բանն իր ծնողների նկատմամբ է անում:
«Հայաստանում այսպիսի դեպքեր հաճախ են պատահում, երբ տարեց ծնողներն իրենց զավակների կողմից հոգեբանական, տնտեսական, ինչու չէ, նաեւ ֆիզիկական բռնության են ենթարկվում: Արտասահմանում, երբ ծնողին տանում են ծերանոց, իրենց համար դա նորմալ է, համարյա նույնն բանն է, երբ երեխաներին մանկապարտեզ են տանում: Բայց մեզ մոտ դա ընդունված պրակտիկա չէ եւ այն ծնողը, որը իր զավակից այդպիսի վերաբերմունքի է արժանանում, շատ խորը հոգեբանական բռնության է ենթարկվում»,-ասաց հոգեբանը: