Համացանցում տեսանյութ է հայտնվել, որում պատկերված է Ստամբուլի պայթյունի պահը: Տեսագրությունը հրապարակվել է թուրքական մի շարք լրատվամիջոցների, մասնավորապես՝ Haber Turk-ի Twitter-ի էջերում:
Ըստ RG-ի, մի քանի վայրկյան տեւողությամբ տեսանյութում հստակ երեւում է այն պահը, երբ պայթում է ավտոբուսի կանգառում նստարանի վրա դրված փաթեթը:
Հիշեցնենք, որ հինգշաբթի Ստամբուլի Սուլթանբեյլի շրջանում պայթուցիկ սարք էր գործի դրվել, ինչի հետեւանքով 2 մարդ է վիրավորվել: Թուրքական ոստիկանությունը փաստի առիթով հետաքննություն է սկսել:
Մինչ այդ, հայտնի է դարձել, որ առաջին պայթյունից մի քանի րոպե անց Ստամբուլի բնակիչները ոստիկաններին հաղորդել են Ղազիօսմանփաշա շրջանում եւս մեկ կասկածելի փաթեթի մասին: Ականատեսների խոսքով, մասնագետների վերահսկողությամբ պայթուցիկը գործի է դրվել: Այս միջադեպի հետեւանքով ոչ ոք չի տուժել:
