Երեւանի «Նորք» ինֆեկցիոն հիվանդանոցում 6 ամսական Ջուլիետա Սարգսյանի մահվան պատճառն, ըստ փորձագետի, եղել է օրգանիզմի ընդհանուր ինտոքսիկացիան: Այս մասին NEWS.am-ի հարցին ի պատասխան հայտնել են Քննչական կոմիտեի տեղեկատվության եւ հասարակայնության հետ կապերի բաժնից:

ՔԿ-ի փոխանցմամբ՝ նախաքննության ընթացքում հարցաքննվել են մեկ տասնյակից ավելի անձինք, նշանակվել է դիակի դատաբժշկական  փորձաքննություն, որի եզրակացությունը ստացվել է 2015թ. հոկտեմբերի 13-ին:

Ըստ փորձագետի եզրակացության՝ Ջուլիետա Սարգսյանի մահվան պատճառ է դարձել օրգանիզմի ընդհանուր ինտոքսիկացիան:

Ջուլիետա Սարգսյանի դիակի դատաբժշկական փորձաքննությամբ մարմնական վնասվածքներ չեն հայտնաբերվել:

Նախաքննության ընթացքում նշանակվել է դատաբժշկական հանձնաժողովային փորձաքննություն, որի եզրակացությունը դեռեւս չի ստացվել:

Նախաքննությունը շարունակվում է:

Նշենք, որ հիվանդանոցի տնօրեն, ՀՀ գլխավոր ինֆեկցիոնիստ Արա Ասոյանի պնդմամբ, Ջուլիանա Սարգսյանի մոտ ախտորոշվել էր երկկողմանի ծանր թոքաբորբ. 6-ամսական երեխան հիվանդանոց էր տեղափոխվել արդեն ծայրահեղ ծանր վիճակում: 12 օր անց փոքրիկը մահացել էր:

Ավելի վաղ հայտնել էինք, որ 2015թ. օգոստոսի 7-ին քաղաքացի Աղասի Սարգսյանից հաղորդում է ստացվել, որ նույն օրը՝ ժամը 12:40-ի սահմաններում, եղբոր դուստրը` 6 ամսական Ջուլիաննա Արթուրի Սարգսյանը, Երեւանի «Նորքի ինֆեկցիոն» հիվանդանոցում բժիշկների անփութության հետեւանքով մահացել է: Դեպքի առթիվ հարուցվել է քրեական գործ Քրեական օրենսգրքի 130-րդ հոդվածի 2-րդ մասով: