Իշխանության կոալիցիայի մասին սերիալը շատ հուզիչ դրամա է: Այս մասին փետրվարի 5-ի խորհրդարանական ճեպազրույցներում հայտնել է «Հայ ազգային կոնգրես» խմբակցության ղեկավար Լեւոն Զուրաբյանը:
«Ամեն օր ամուսնանում են, բաժանվում, ներում իրար, նորից վիրավորում: Գոնե սցենարի հեղինակներն ավելի հետաքրքիր մի բան մտածեին այս անվերջանալի սերիալի համար»,- հեգնել է Զուրաբյանը: Իսկ հետո շարունակել, որ եթե լուրջ խոսենք, ապա ցանկացած ժողովրդավարական երկրում կոալիցիան ձեւավորվում է ոչ թե ընտրություններից առաջ, այլ հետո, երբ ընտրություններում առաջին տեղը զբաղեցրած կուսակցությանը ձայները չեն բավականացնում կառավարություն ձեւավորելու համար:
«Թե ինչու են ՀՀԿ-ն ու ՀՅԴ-ն կոալիցիայի մասին հանրաքվեից հետո սկսել խոսել՝ միանգամայն հասկանալի է: Ուժերից մեկն, ըստ էության, գիտի, որ պարտվել է ու չունի հասարակության բավարար վստահությունը: Իսկ մյուսն էլ ուզում է լուծել նոր խորհրդարան մտնելու հարցը»,- ամփոփել է ՀԱԿ խմբակցության ղեկավարը:
