Ֆելիքս անունով սեւ-սպիտակ կատվին, որը հինգ տարի շարունակ մուկ էր որսում Արեւմտյան Յորքշիրի Հադդերսֆիլդ երկաթուղային կայարանում, վնասատուների գծով ավագ վերահսկիչ են նշանակել, տեղեկացնում է Lenta-ն` վկայակոչելով The Daily Mail-ին:
Ինչպես նշում են կայարանի աշխատակիցները, 2011-ից ի վեր կատուն ոչ միայն կրծողների է որսացել, այլեւ ընկերներ է գտել ուղեւորների շրջանում: Իր աշխատանքի համար Ֆելիքսին կանոնավոր կերպով հյուրասիրել են: Այժմ նրա աշխատանքի համար ի երախտագիտություն, երկաթուղային TransPennine Express ընկերությունը նրա համար լույսն արտացոլող տարրերով հատուկ թիկնոց է կարել եւ անվանական կրծքանշան է պատրաստել:
Բացի այդ, այն արգելքների վրա, որոնք կառուցվել են անտոմս ուղեւորներին որսալու նպատակով, կատվի համար կայարան մտնելու հատուկ անցք են բացել:
Ֆելիքսը կայարանում է հայտնվել, երբ ինը ամսական ձագ էր եւ տղամարդու անուն է ստացել, որովհետեւ երկաթուղու աշխատակիցները նրան արու կատվի տեղ էին դրել:
«Նա կարող է ուղղակի բարձրահարթակին նստել ինձ հետ, երբ ես լարված ժամերին աշխատում եմ կայարանում, նրա ներկայությունն ինձ ստիպում է ժպտալ: Իրենց գործերով շտապող ուղեւորները եւս, Ֆելիքսին նկատելով, հալվում են ժպիտի մեջ: Նա ընտանիքի անդամ է», — պատմել է կայարանի հաճախորդների հետ աշխատանքի ծառայության աշխատակիցը:
