Ռոյալներ եւ դաշնամուրներ արտադրող Steinway & Sons ընկերությունը եւ հախճապակու ֆրանսիական Lalique ապրանքանիշը հայտնել են Masque de Femme («Կանացի դիմակ») ռոյալի բացառիկ նմուշի թողարկման մասին: Սեւ գույնի գործիքը զարդարված է հախճապակե երկու նախշով` Coutard եւ Masque de Femme, որոնք հորինել էր Lalique-ի հիմնադիր Ռենե Լալիկը, տեղեկացնում է Lenta-ն:
Լալիկը Coutard նախշը ստեղծել էր 1935-ին` համանման շատրվանի վրա աշխատելիս: Դրանք կաթիլի տեսքով հախճապակե պաստառագամեր են, որոնք համաչափ զարդարանք են ստեղծում: Իսկ շատրվանը զարդարում էր դարձյալ Ռենե Լալիկի կողմից ստեղծված Masque de Femme նախշը. նկարիչն ու ոսկերիչը պատկերել է գետային Ալփեոս աստծու սիրեցյալ Արետուսա նիմփայի` հին հունական առասպելի հերոսուհու դեմքը` բոլորակված ջրի շիթերով: Նրա հետապնդումից փախչելով` նիմփան գետի վտակի է վերածվել: Այդ նախշն ընտրելով` ռոյալի ստեղծողները հավանաբար հաշվի են առել առասպելի եւ երաժշտության կապը. XVIII դարում Արետուսան կոմպոզիտոր Անդրե Կամպրի բարոկկոյական օպերայի գլխավոր կերպարն էր դարձել:
2016-ին Masque de Femme ռոյալը համաշխարհային շրջագայության կմեկնի, որի ընթացքում տեղի կունենան հայտնի դաշնակահարների համերգներ: Շրջագայության ավարտին ռոյալը աճուրդով կվաճառեն: