ՀՀ արդարադատության նախարարության «Նուբարաշեն» քրեակատարողական հիմնարկի կալանավորներ Արմեն Կ.-ն եւ Կարեն Օ.-ն հայտնել են ՀՀ ոստիկանության Նոր Նորքի բաժնի ծառայողների կողմից առերեւույթ պաշտոնեական լիազորություններն անցնելու վերաբերյալ տվյալներ:
ՀՔԾ-ից NEWS.am-ին հայտնում են, որ մասնավորապես՝ ՀՀ արդարադատության նախարարության «Նուբարաշեն» քրեակատարողական հիմնարկի կալանավորներ Արմեն Կ.-ն եւ Կարեն Օ.-ն նույնաբովանդակ հաղորդումներ են տվել այն մասին, որ 2015 թվականի դեկտեմբերի 25-ին Երեւան քաղաքի Նանսենի փողոցից եւ Նոր Նորքի 9-րդ զանգվածից ՀՀ ոստիկանության Նոր Նորքի բաժին բերման ենթարկվելիս նույն բաժնի ծառայողներն իրենց բաճկոնների գրպանները թմրամիջոց են գցել:
Այնուհետեւ ոստիկանության հիշյալ բաժնում կատարված անձնական խուզարկությունների ժամանակ հայտնաբերվել են նշված թմրամիջոցները եւ արձանագրվել, որ դրանք իրենց են պատկանում:
Արմեն Կ.-ի եւ Կարեն Օ.-ի հաղորդումների հիման վրա՝ ՀՀ ոստիկանության Նոր Նորքի բաժնի ծառայողների կողմից առերեւույթ պաշտոնեական լիազորություններն անցնելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 309-րդ հոդվածի 1-ին մասի հատկանիշներով հարուցվել է քրեական գործ:
Կատարվում է նախաքննություն: