Թուրքիայում լրատվամիջոցները իշխանությունների աճող ճնշման տակ են գտնվում, շարունակվում են լրագրողների ձերբակալությունները եւ նրանց դեմ դատական հետաքննությունները։ Այս մասին ՏԱՍՍ-ին հայտնել է ՌԴ ԱԳՆ՝ մարդու իրավունքների, ժողովրդավարության եւ օրենքի գերակայության հարցերով լիազոր ներկայացուցիչ Կոնստանտին Դոլգովը
«Լրատվամիջոցների խոսքի ազատությունը եւ նրանց գործունեությունը թուրքական իշխանությունների աճող ճնշման տակ են գտնվում։ Իրավապաշտպանները հայտնում են, որ մամուլում վախի մթնոլորտ են սերմանում»,- ասել է Դոլգովը։
Նա նշել է, որ ընդդիմադիր Ժողովրդա-հանրապետական կուսակցության տեղեկություններով՝ 2015թ. երկրում հետաքննություն է սկսվել 7 լրատվական կառույցի դեմ, ձերբակալվել է 156 թղթակից, 32 լրագրող էլ կալանքի տակ է գտնվում։ «2015թ. քաղաքական դրդապատճառներով աշխատանքից ազատվել է 774 աշխատակից, իսկ 238-ի նկատմամբ դատական գործեր են բացվել»,- ասել է Դոլգովը։
Հատկապես հանրային արձագանք ստացած գործերից նա առանձնացրել է «Ջումհուրիյեթ»-ի գլխավոր խմբագրի կալանքը, որին կալանավորել էին Թուրքիայի ազգային հետախուզական կազմակերպության կողմից Սիրիա մատակարարումներ իրականացնելու մասին հոդվածի համար։