Դսեղ գյուղում փետրվարի 1-ի երեկոյան բանակի քեֆի ժամանակ իր համագյուղացու վրա որսորդական հրացանով կրակած երիտասարդը եղել է ալկոհոլի ազդեցության տակ։ Այս մասին NEWS.am-ի հետ զրույցում ասաց Դսեղի բնակիչներից մեկը՝ նշելով, որ Արարատ Խաչատրյանի վրա կրակած Կամո Խ.-ն որսորդական հրացանն իր տնից է բերել եւ կրակել 43-ամյա տղամարդու սրունքին։
Մեզ հետ զրույցում Դսեղի բնակիչը նշեց, որ Կամոն արդեն մի քանի տարի է ամուսնացած է, զբաղվում է գյուղատնտեսությամբ, գյուղացիները զարմացած են, որ նա նման քայլի է գնացել։
«Արարատն ու Կամոն ընկերներ են, լավ հարաբերությունների մեջ, ուղղակի ալկոհոլի ազդեցության տակ է եղել եւ չի հասկացել, թե ինչ է արել»,-նշեց նա։
Ավելի վաղ տեղեկացրել էինք, որ Դսեղ գյուղում բանակի քեֆի ժամանակ հնչած կրակոցների հետեւանքով ոտքի հրազենային վնասվածք ստացած Վանաձորի 43-ամյա բնակիչ Արարատ Խաչատրյանին Վանաձորի բժշկական կենտրոնից տեղափոխել են Երեւանի թիվ 1 համալսարանական հիվանդանոց, նրա վիճակը բավարար է:
Հիշեցնենք, որ Լոռու մարզի Դսեղ գյուղում փետրվարի 1-ի երեկոյան բանակի քեֆի ժամանակ ծեծկռտուք է սկսվել, որի ընթացքում կրակոցներ են հնչել եւ մեկ հոգի վիրավորվել է:
Դեպքի առթիվ հարուցվել է քրեական գործ՝ ՔՕ 112-րդ հոդվածի 1 մասով եւ 235-րդ հոդվածի 1-ին մասով: Կասկածյալը ձերբակալված է։