Զվարթնոց-Երեւան ճանապարհային հատվածը, որը գտնվում է Արմավիրի մարզի տարածքում, ոչ թե Արմավիրի, այլ Երեւանի սպասարկման տակ է: Այս մասին NEWS.am-ի հետ զրույցում ասաց Արմավիրի մարզպետ Աշոտ Ղահրամանյանը՝ անդրադառնալով Զվարթնոց օդանավակայանից Երեւան տանող ճանապարհի՝ Արմավիրի մարզի տարածքի աղբավայրերի մասին հայտարարությանը:
«Ես չգիտեմ՝ ինչ աղբավայրի մասին է խոսքը գնում: Եթե դա ճանապարհի 10 մետր կամ 7 մետրի վրա է, այն Երեւան քաղաքի սպասարկման ներքո է»,- ասաց մարզպետը:
Աշոտ Ղահրամանյանը նշեց, որ իրենք պարբերաբար աղբահանություն են անում մարզի տարածքում:
Նշենք, որ խնդրի վերաբերյալ հայտարարություն էր տարածել Երեւանի ավագանու «Բարեւ Երեւան» խմբակցության անդամ Անահիտ Բախշյանը: Նա մարզպետից պահանջել էր վերացնել Երեւանի մուտքի ճանապարհի աղբը:
