Երեւանի բնակչուհի 52–ամյա Սուսաննա Պապոյանը մեղադրվում է հանգուցյալ եղբոր կնոջ՝ Լուսինե Բաբայանի եւ նրա հոր` Հրանտ Բաբայանի սպանությունը պատվիրելու մեջ։ Այս մասին NEWS.am–ը տեղեկանում է Արմավիրի մարզի ընդհանուր իրավասության դատարանից։
Ըստ մեղադրականի՝ Սուսաննա Պապոյանը, նպատակ ունենալով խուսափել Լուսինե եւ Հրանտ Բաբայանի կողմից ներկայացված գույքային պահանջով քաղաքացիական հայցով նախատեսված 27. 000. 000 ՀՀ դրամ վճարելուց, որոշել է սպանել նրանց և պատվիրել է իր ազգական Արմեն Պապոյանին և վերջինիս ընկեր Ավետիս Խաչատրյանին կազմակերպել Լուսինե և Հրանտ Բաբայանների սպանությունները` դրա դիմաց խոստանալով վճարել 10.000 ԱՄՆ դոլար:
Ստանալով Արմեն Պապոյանի և Ավետիս Խաչատրյանի կողմից սպանությունները կազմակերպելու համաձայնությունը` Սուսաննա Պապոյանը կատարել է նաև Լուսինե և Հրանտ Բաբայանների սպանությանն ուղղված նախապատրաստական գործողություններ` Արմեն Պապոյանին և Ավետիս Խաչատրյանին մատնանշելով նրանց բնակության վայրերը, այդ թվում հայտնելով բնակարանների գտնվելու հարկերը և Արմեն Պապոյանի հետ քննարկելով սպանելու եղանակները։
Սուսաննա Պապոյանի կողմից անկախ հանգամանքներում, սակայն հանցագործությունն ավարտին չի հասցվել, քանի որ Արմեն Պապոյանը հրաժարվել է հանցագործության կատարումից և 2015թ. հունվարի 22-ին հաղորդում է տվել նախապատրաստվող հանցագործության վերաբերյալ:
Սուսաննա Պապոյանը կատարել է հանցավոր արարք, որը նախատեսված է ՀՀ քրեական օրենսգրքի 38-35-104 հոդվածի 2-րդ մասի 1-ին, 7-րդ և 8-րդ կետերով: Նա կալանավորված է։