Սպասվում էր, որ կոալիցիայի շուրջ ՀՀԿ-ՀՅԴ բանակցություններն այս շաբաթ կավարտվեին, սակայն պաշտոնների հարցը Դաշնակցությունում ոչ մի կերպ չեն կարողանում լուծել: Սոցիալիստական կուսակցությունն այս անգամ հակված չէ սոցիալական ոլորտներին, ավելի շատ շեշտը դրել է այնպիսի պորտֆելների վրա, որոնք 2017-ի խորհրդարանական ընտրություններին կարող են ծառալել որպես քվե բերող լծակներ: Տեւական ժամանակ է` շրջանառվում է, որ Արագածոտնի եւ Շիրակի մարզպետների պաշտոններից բացի Գեղարքունիքն էլ է օրակարգում, որը պահանջում է Դաշնակցությունը, իսկ Սերժ Սարգսյանը դրա փոխարեն առաջարկում է աշխատանքի ու սոցիալական հարցերի նախարարությունը, ինչը իրենց սրտով չէ: Թե որքանով է հավանական, որ այն կտրվի ՀՅԴ-ին, NEWS.am-ը փորձել է ճշտել մարզպետ Ռաֆիկ Գրիգորյանից: Նշենք, որ նախկին կոալիցիոն կառավարման ժամանակ (2008-2012) այն տրվել էր ԲՀԿ-ին:
Պարոն Գրիգորյան, տեղյա՞կ եք Ձեր պաշտոնի շուրջ ընթացող բանակցություններից, կարծո՞ւմ եք, որ այն կտրվի ՀՅԴ-ին:
Ես լրատվամիջոցներում եմ տեսնում, որ բանակցություններ են ընթանում, իսկ թե ինչպիսին կլինի արդյունքը, չեմ կարող ասել: Ըստ լրատվամիջոցների` մարզպետներն ազատվեցին աշխատանքից, կառավարության կազմը փոխվեց, ես այս խոսակցությունները համարում եմ անլուրջ:
Այնուամենայնիվ, հավանակա՞ն եք համարում, որ այս պաշտոնն էլ կտրվի Դաշնակցությանը:
Ամեն շաբաթ կուսակցության Գործադիր մարմնի նիստ է տեղի ունենում, որտեղ քննարկվում են բոլոր հարցերը: Եթե բանակցությունների ընթացքում կուսակցության ղեկավար, հանրապետության նախագահը կորոշի, որ իրականում Դաշնակցության հետ համագործակցությունը անհրաժեշտություն է ու պետք է տրվի Գեղարքունիքի մարզպետի պաշտոնը, ես կողմնակից կլինեմ: Եթե կայացվի նման որոշում կուսակցության ղեկավարի կողմից, պատրաստ եմ առանց որեւէ անհանգստության իմ տեղը զիջել:
Դաշնակցության կուլիսներում խոսակցություններ կան, որ հատկապես այս մարզը գրավիչ է 2017-ի ընտրություններին ձայներ ունենալու համար` հաշվի առնելով, որ այստեղ ընդդիմադիր տրամադրություններն այդքան սրված չեն:
Ես չգիտեմ, թե ինչի են ձգտում, դա իրենց պետք է հարցնեք, երեւի ինչ-որ հետաքրքրություն կա, բայց կարծում եմ` էական տարբերություն չկա մարզերի միջեւ: Բայց այդ մեկնաբանությունները, որ գրվում են, որ իբրեւ ՀՅԴ-ն ուզում է մարզը ղեկավարել ձայներ ունենալու համար, կարծում եմ` Գեղարքունիքում չի ստացվի, քանի որ Գեղարքունիքը ավանդապաշտ մարզ է եւ այդ մարզում կարճ ժամանակահատվածում իրավիճակի փոփոխություն չի կարող տեղի ունենալ: