Քվեարկված ընտրացուցակների հրապարակումը մարդու իրավունքների ոտնահարում է: Այս մասին NEWS.am_ի հետ զրույցում ասաց ՀՀԿ խմբակցության քարտուղար Գագիկ Մելիքյանը:
«Միջազգային կառույցները նույնպես խոսում են դրա մասին, որ մարդու իրավունքների ոտնահարում է քվեարկության մասնակցության մասին հրապարակում կատարելը: Սա իրականություն է, եւ միջազգային լուրջ կառույցները դրա դեմ ունեն փաստարկներ»,-ասաց ՀՀԿ-ական պատգամավորը:
Իշխանական պատգամավորը դեմ է նաեւ ընդդիմության` ուռճացված ցուցակների մաքրման պահանջին:
«Ընտրացուցակներում ներառել միայն նրանց անունները, ովքեր տվյալ պահին գտնվում են Հայաստանում, չեմ կարծում, որ դա ճիշտ է, ՀՀ ցանկացած քաղաքացի, ով նույնիսկ ընտրության պահին չի գտնվում Հայաստանում կամ մեկ ամիս առաջ հեռացել է, դա իրավունք չի վերապահում` որեւէ մեկին հանել նրան ընտրացուցակից, կարծում եմ` հակասում է օրենսգրքին»,- նշել է Մելիքյանը:
Բազմակի քվեարկությունը կանխելու նպատակով ընդդիմության մյուս առաջարկը` մատնահետքով քվեարկությունը եւս իշխանության ներկայացուցչի սրտով չէ: Շեշտեց, որ էլեկտրոնային քվեարկության տարբեր մեխանիզմներ կան` այդ թվում նույնականացման քարտով քվերակությունը:
«Մատնահետքով ընտրությունը առաջարկություն է, ընդհանրապես, առաջիկայում կլինեն նաեւ այլ առաջարկություններ, որոնք նույնպես քննարկման նյութ կդառնան: Չեմ խորշի ասել նաեւ այն հանգամանքը, որ ընտրական գործընթացները դեռեւս տեղի չունեցած` ընդդիմադիր քաղաքական ուժերի կողմից խոսվում է դրանց կեղծման մասին»,-սրտնեղեց Մելիքյանը:
Հարցին, թե ինչ են թաքցնում այդ ցուցակներում, որ հրապարակելուց այդքան վախենում են, պատասխանեց. «Որեւէ քաղաքական ուժ` այդ թվում իշխանությունն ու ընդդիությունը չեն կարող ընտրացուցակներում թաքցնել ինչ-որ բան»: