ԲՀԿ խմբակցության պատգամավոր Ստեփան Մարգարյանը NEWS.am-ի հետ զրույցում անհեթեթություն համարեց իշխանության այն պնդումները, որ քվեարկված ցուցակների հրապարակումը քվեարկողի գաղտնիության իրավունքի խախտում է:
«Ես անհեթեթություն եմ համարում, որ ասում են խախտվում է գաղտնիության իրավունքը, եթե կան բազմաթիվ տեսախցիկներ ու նկարահանում են տեղամասը, քաղաքացիներին, որոնք քվեարկում են, մտնում են տեղամաս ու դուրս գալիս, ինչ գաղտնիության մասին է խոսքը»,- նշել է նա:
Պատգամավորը հետին միտք է տեսնում նաեւ համամասնական ընտրակարգը կուսակցության թեկնածուների ռեյտինգային ցուցակով իրագործելու գաղափարի մեջ: Ըստ նրա` այդպիսով մեխանիզմը փորձում են նմանեցնել մեծամասնական ընտրակարգին, մինչդեռ կուսակցությունների կայացմանը նպաստում է համամասնական ընտրակարգն առանց ռեյտինգային մոդելի:
«Եթե ասում ենք` կարեւոր է քաղաքական, կուսակցական համակարգի կայացումը, էդ դեպքում բերեք մաքուր համամասնական ընտրակարգ անենք: Եթե մաքուր չենք անում, ուրեմն հետին միտք կա: Այսինքն` ռեյտինգով կարելի է հետ բերել մեծամասնական ընտրակարգը»,-ասաց պատգամավորը:
Մեր զրուցակիցը, որը դեմ է եղել սահմանադրական փոփոխություններին, ասաց, որ կողմ է մատնահետքով քվեարկությանը, ինչը միաժամանակ լուծում է մի քանի հարց:
«Կրկնակի քվեարկության կանխումը եւ փաստաթղթի հարցն է լուծվում, անձը հաստատող ցանկացած փաստաթղթով կարող ես գնալ եւ քվեարկել»: Լուծվում է նաեւ ցուցակները հրապարակելու հարցը: Մատնահետքով քվեարկության դեպքում, ըստ նրա, կարող են չհրապարակվել ցուցակները: