Առերեսում է տեղի ունեցել Երեւանում նոյեմբերի 25-ին վնասազերծված զինված խմբի ղեկավար Արթուր Վարդանյանի եւ նույն գործով կալանավորված ազատամարտիկ Խաչիկ Ավետիսյանի միջեւ: Այս մասին NEWS.am-ին հայտնեց ազատամարտիկի պաշտպան Գիվի Հովհաննիսյանը:
Պաշտպանի խոսքով՝ Խաչիկ Ավետիսյանը առերեսվել է նաեւ Արա Պողոսյանի եւ արդեն ազատության մեջ գտնվող Ավետիս Բարեյանի հետ:
Նախաքննության եւ իր պաշտպանյալի շահերից ելնելով՝ Գիվի Հովհաննիսյանը չհայտնեց ցուցմունքների բովանդակության եւ ցուցմունքներում առկա հակասությունների մասին:
Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Մեղադրյալների թիվը չի հաղորդվում, սակայն տեղեկություններ կան, որ նրանց թիվն անցնում է 30-ը: