Վարդենիսում տարիներ առաջ սպանված 16-ամյա աղջկա հոր` Աղաբեկ Սարգսյանի առողջական վիճակը կտրուկ վատացել է սպանության համար դատապարտված ամուսինների օգտին ՄԻԵԴ-ի կայացրած որոշումից հետո: Ամիսներ առաջ սպանված աղջկա հայրը վշտից մահացել է: NEWS.am-ի հետ զրույցում ընտանիքի ծանոթներից մեկը պատմեց, որ նրա մոտ դստեր մահվանից հետո առողջական խնդիրներ էին առաջացել:
Իսկ ամիսներ առաջ` երբ ՄԻԵԴ-ը սպանության համար դատապարտված ամուսինների օգտին վճիռ է կայացրել, Աղաբեկ Սարգսյանի առողջական վիճակն ավելի է վատացել: «Շատ ծանր էր տանում այդ դեպքը, չմոռացավ այդ վիշտը, շատ ծանր էր տանում: Վճիռը վատացրեց վիճակը: Թե չէ ինքը նախկինում թիկնեղ, առողջ մարդ էր, դեպքից հետո կոտրվեց»,- ասաց նրա ծանոթը: Սպանության համար տարիներ առաջ դատապարտված ու պատիժը կրած Բագրատ Նալբանդյանը NEWS.am-ի հետ զրույցում պնդել է, որ ոստիկանությունում իրեն ուշագնացության աստիճանի ծեծել էին ու ստիպել ստորագրել ինքնախոստովանական ցուցմունքի տակ: Բագրատ Նալբանդյանի խոսքով՝ նույն գործով 14 տարով ազատազրկված իր կնոջն էլ դատապարտել են միայն ինքնախոստովանական ցուցմունքների հիման վրա:
Նշենք, որ Մարդու իրավունքների եվրոպական դատարանի` 2015թ. դատավճռով հաստատվել է, որ խախտվել են ամուսինների իրավունքները, եւ Վճռաբեկ դատարանը գործի վերաբացման վարույթ է սկսել, գործը շուտով կվերաբացվի: Բացի այդ՝ ՄԻԵԴ-ը վճռով Հայաստանի հանրապետությանը պարտավորեցրել էր 62 հազար եվրո փոխհատուցում վճարել ամուսիններին: Նալբանդյանների ընտանիքը ստացել է փոխհատուցումը:
Ըստ մեղադրական եզրակացության` 2004թ. անչափահաս Սյուզաննա Սարգսյանը գնացել էր իր համադասարանցու տուն, որտեղ, վիճելով նրա մոր` Նարինե Նալբանդյանի հետ, ապակե շշով դեմքին մի քանի հարված էր ստացել: Ամուսինները մետաղալարով կապել էին ուշագնաց 16-ամյա Սյուզաննայի ձեռքերը, փակել բերանը, 5-6 ժամ թողել էին խոհանոցում, ապա, նրան կեսգիշերին նետել իրենց տնից ոչ հեռու գտնվող մազութի հորը, որտեղ էլ Սյուզաննան մահացել էր:
2005-ին Գեղարքունիքի մարզի առաջին ատյանի դատարանը առանձնակի դաժանությամբ սպանություն կատարելու մեղադրանքով Նարինե Նալբանդյանին դատապարտել էր 14, Բագրատ Նալբանդյանին՝ 9 տարվա ազատազրկման: Հայաստանի դատական ատյանները նույնն էին թողել վճիռը: Ամուսինների փաստաբանը դիմել էր ՄԻԵԴ 2006 թ.: 2015թ. ՄԻԵԴ-ը կայացրել է որոշում: