Երեւանում հունվարի 6-ին դանակի 14 հարված ստացած 16-ամյա Խաչիկ Ղազանչյանի վիճակում մեկ ամիս անց որեւէ դրական տեղաշարժ չի նկատվում, նրա կյանքին վտանգ է սպառնում: Այս մասին այսօր` փետրվարի 7-ին, NEWS.am-ին հայտնեցին «Արաբկիր» բժշկական կենտրոնի անեսթեզիոլոգիական եւ վիրաբուժական ինտենսիվ թերապիայի բաժանմունքից:
Խաչիկ Ղազանչյանի ճնշումը կարգավորվում է դեղորայքի միջոցով, նա միացված է արհեստական շնչառության ապարատին: Տղայի վիճակը ծայրահեղ ծանր է:
Հարազատների խոսքով, Խաչիկ Ղազանչյանին դանակի 14 հարված է հասցրել 18-ամյա Սուրեն Մուրադյանը, որը նրա մտերիմ ընկերն է: Նրանց պատմելով՝ դեպքը տեղի է ունեցել, երբ Խաչիկը, Սուրենն ու մեկ այլ տղա գնալիս են եղել իրենց ընկերոջ ծննդյան տոնին: Ծնողների համար անհայտ է` ինչու են տղայի հետ նման կերպ վարվել: Նրանք նաեւ տարօրինակություններ են նկատել կասկածյալի մոտ։
Դեպքի առթիվ հարուցվել է քրեական գործ ՔՕ 34-104-րդ հոդվածի հատկանիշներով:
Դանակահարության մեջ կասկածվողին որոնում են: