Հունվարի 31-ից փետրվարի 8-ը Կահիրեի Ղպտի Ուղղափառ եկեղեցու Ս. Մարկոս կենտրոնում տեղի է ունեցել Կաթոլիկ-Արեւելյան Ուղղափառ միջեկեղեցական աստվածաբանական հանձնախմբի հերթական նիստը:
Հունվարի 31-ին Ս. Բիշոյ վանքում հանձնախմբի անդամներին ընդունել եւ իր օրհնություններն է բաշխել Ղպտի Ուղղափառ եկեղեցու պետ Նորին Սրբություն Թավադրոս Բ-ը:
Փետրվարի 1-5-ը հանձնախումբը քննարկել է Արեւելյան Ուղղափառ եւ Կաթոլիկ եկեղեցիների ծիսական ավանդության որոշ հարցեր, մասնավորապես Մկրտության ծիսակարգի ընկալման ու կատարման ծիսական-աստվածաբանական առանձնահատկությունը յուրաքանչյուր եկեղեցական ընտանիքի ավանդության շրջանակից ներս:
Մայր Աթոռ Սուրբ Էջմիածնից հանդիպմանը մասնակցել են Եգիպտոսի Հայոց թեմի առաջնորդ Գերաշնորհ Տ. Աշոտ եպիսկոպոս Մնացականյանը եւ Դամասկոսի Հայոց թեմի առաջնորդ Գերաշնորհ Տ. Արմաշ եպիսկոպոս Նալբանդյանը:
Միջեկեղեցական-աստվածաբանական հանձնախմբի նիստի ընթացքում որոշվել է հաջորդ նիստը գումարել Հռոմում, 2017 թ. հունվարի 21-28-ին` իբրեւ քննարկման նյութ ունենալով Սուրբ Պատարագն ու դրան հարակից ծիսական-աստվածաբանական հարցերը:
