ԻՊ ահաբեկչական խմբավորման զինյալները սպանել են Իրաքի հյուսիսային Մոսուլ քաղաքի 300 բնակիչների:
Այս մասին հայտնել է ժողովրդական աշխարհազորի ներկայացուցիչ Մահմուդ աս- Սուրջին:
«ԻՊ ջոկատները նոր կոտորածներ են կազմակերպել Մոսուլում՝ քաղաքի տարածքում մահապատժի ենթարկելով 300 մարդու»,- մեջբերում է Al Arabia հեռուստաալիքը Ասիլ ան Նուջեյֆիի ղեկավարած ռազմականացված խմբավորման ներկայացուցչի խոսքերը: Ասիլ ան- Նուջեյֆին Նայնավա պրովինցիայի նահանգապետն է, որի վարչական կենտրոնը Մոսուլն է:
Աս -Սուրջին շեշտել է, որ զոհվածների մեծ մասը ոստիկանության նախկին աշխատակիցներ ու զինծառայողներ են: Թե ինչ ժամանակահատվածում են կատարվել այդ հանցագործությունները՝ չեն նշում, հայտնում է ՏԱՍՍ-ը:
Ինչպես հայտնել են ՄԱԿ-ի Իրաքի աջակցության առքելությունից՝ շարունակական բռնությունների զոհերի թիվը հունվարին գրեթե 850-ի էր հասել, եւս 1450 –ն էլ տարբեր վնասվածքներ են ստացել: Համաշխարհային կազմակերպության ներկայացուցչության տվյալներով Նայնավայում անցած ամիս 55 իրաքցի է զոհվել: