ՕԵԿ խմբակցության համար ընդունելի է այն տարբերակով քվեարկության մոդելը, որը կբացառի բազմակի քվեարկությունը։ Այս մասին NEWS.am-ի հետ զրույցում ասաց ՕԵԿ խմբակցության ղեկավար Հեղինե Բիշարյանը։
«Ցավոք, մենք տեղյակ էլ չենք՝ ինչ են քննարկում նոր Ընտրական օրենսգրքում ներառելու համար: Բոլոր տարբերակները մեզ համար քննարկման առարկա են, այն տարբերակները, որոնք հնարավորություն կտան բացառել բազմակի քվեարկությունները, մեզ համար կլինի շատ ընդունելի»,-ասաց Բիշարյանը։
Անդրադառնալով ՀՀԿ-ի առաջարկած եւ այս պահին քննարկող տարբերակին, որ նույնականացման քարտով մեկանգամյա էլեկտրոնային քվեարկությունը կբացառի կեղծիքները, նա ասաց. «Փորձը ցույց տվեց, մենք էլ տեսանք, թե ինչպես բազմաթիվ մարդիկ գնացին քվեարկեցին մի քանի անգամ։ Հիմա եթե մենք կարողանանք ճիշտ համակարգ դնել, որ իսկապես կրկնակի քվեարկությունը բացառվի, մենք համաձայն կլինենք։ Հանրաքվեի ժամանակ նույնականացման քարտով մի քաղաքացին մի քանի տեղ քվեարկեց։ Հիմա ինչպե՞ս կարող ենք հավատալ մի խոսքի, երբ տեսել ենք՝ քարտերով ինչպես է լինում քվեարկությունը։ Կեղծ գաղափարներով կերակրել, որ մեկ անգամ քվեարկելով է լինելու, ես հակված եմ չհավատալու ու պայքարելու եմ դրա դեմ»,-ասաց Հեղինե Բիշարյանը։
