2015թ. դեկտեմբերի ու նոյեմբերի համեմատ, 2016թ. հունվարին արձանագրվել է էլեկտրաէներգիայի միջին կշռված սակագնի աճ՝ մոտ 2 տոկոսի սահմաններում: Այս մասին այսօր` փետրվարի 8-ին, լրագրողների հետ հանդիպման ժամանակ նշել է ՀՀ Ազգային վիճակագրական ծառայության նախագահի խորհրդական Գուրգեն Մարտիրոսյանը:
«Նախորդ տարվա հուլիսից հոսանքի սակագնի փոփոխություն տեղի ունեցավ` 6.93 դրամի չափով, որը կառավարության կողմից ամբողջությամբ սուբսիդավորվում էր եւ հոկտեմբերից սկսած իրականացվեց մասնակի սուբսիդավորում` մինչեւ 250 կվտ/ժամ սպառող բնակչությանը ամբողջությամբ սուբսիդավորվում է ավելացված մասով, իսկ 250 կվտ/ժամից ավելի էլէներգիա սպառողների համար այդ սուբսիդավորումը տեղի չի ունենում: Երբ համեմատում ենք գիշերային եւ ցերեկային` մինչեւ 250 եւ 250-ից ավելի սպառողների մասնաբաժինները, ապա փաստացի տեղի է ունեցել միջին կշռված սակագնի աճ՝ երկու տոկոսի չափով»,-ասաց նա: