Իրանն օրական 300 հազար բարել նավթ կմատակարարի եվրոպացի հաճախորդներին: Total–ն արդեն պատրաստ է օրական 160 հազար բարել ներմուծել: Պատժամիջոցների վերացումից հետո առաջին արեւմտյան ընկերությունը սկսել է իրանական նավթի տեղափոխումը:
Իրանը նախատեսել է օրական 300 հազար բարել վաճառել եվրոպացի հաճախորդներին, հայտնել է Իրանի նավթի նախարար Բիջան Զանգանեն:
Հունվարի սկզբին Իրանի իշխանությունները կարգադրել էին նավթի արդյունահանումն ավելացնել օրական 500 հազար բարելով: Մատակարարումների մնացած ծավալը կուղղվի Ասիա, տեղեկացնում է RBK-ն:
Զանգանեի խոսքով, ֆրանսիական Total-ը, փետրվարի 16-ից սկսած, օրական 160 հազար բարել կներմուծի: Ավելի վաղ ֆրանսիական ընկերությունում խոսում էին օրական 150 հազարից մինչեւ 200 հազար բարել գնելու մասին, բայց հրաժարվել են մեկնաբանել առաջին մատակարարումը:
Պատժամիջոցների վերացումից հետո առաջին անգամ արեւմտյան ընկերությունները սկսել են իրանական նավթի մատակարարումներ իրականացնել, գրում է WSJ-ն: Նավային ընկերության ներկայացուցիչների խոսքով, իրանական նավթի առաջին բեռնումն իրականացրել է Glencore ընկերությունը:
Շատ նավատերեր հրաժարվում են իրանական նավթ տեղափոխել, որովհետեւ պահպանվում են ամերիկյան պատժամիջոցները, որոնք արգելում են իրանական կազմակերպությունների հետ դոլարով առեւտուր անել, նշում է WSJ-ն: Նավթի մեծ մասի համար դոլարով են վճարում, իսկ եվրոպական շատ ապահովագրողներ ամերիկյան ֆինանսական կառույցներ են օգտագործում կամ էլ գործակցում են ամերիկյան ընկերությունների հետ, ինչը բարդացնում է Իրանի հետ նրանց համագործակցությունը:
Իրանական ազգային նավթային ընկերությունում (NIOC) մտադիր են հրաժարվել դոլարային հաշվարկներից: Ինչպես անցյալ շաբաթ Reuters գործակալությանը հայտնել է ընկերության ներկայացուցիչը, մատակարարված նավթի համար հաշիվները կներկայացվեն եվրոյով: Նույն տարադրամով է Թեհրանը մտադիր պահանջել արդեն իրականացված մատակարարումների դիմաց պարտքերը:
