Եվրամիության եւ Թուրքիայի միջեւ վերաընդունման մասին համաձայնագիրը կարող է ուժի մեջ մտնել արդեն 2016-ի հունիսին` նախատեսված ժամկետից ավելի շուտ: Այդ մասին տեղեկացրել է Եվրահանձնաժողովի ներկայացուցիչ Մինա Անդրեեւան, տեղեկացնում է «ՌԻԱ Նովոստին»:
«Վերաընդունման մասին պայմանագիրը կարող էր ուժի մեջ մտնել 2017-ի հոկտեմբերին, բայց տեղափոխվել է 2016-ի հունիս` վիզաների ազատականացման գործընթացին զուգահեռ», — Բրյուսելում ասել է նա լրագրողներին:
Միաժամանակ Անդրեեւան ընդգծել է, որ վերաընդունման պայմանագրի ուժի մեջ մտնելը եւ վիզայական ազատականացման գործընթացները երկու տարբեր բանակցային գործընթաց են:
Անդրեեւան նաեւ հայտնել է, որ Անկարայի կողմից հարցում չի ստացվել Թուրքիայի տարածքում սիրիացի փախստականների աջակցության ֆինանսավորման համար: ԵՄ-ն եւ համայնքի երկրները պարտավորվել են այն նպատակի համար 2016-2017 թվականներին համատեղ երեք մլրդ տրամադրել, սակայն ԵՄ-ի ներկայացուցչի խոսքով, այդ միջոցները ֆիզիկապես դեռ տեղ չեն հասել: