Պաշտոնական տվյալներով հունվարին ամսական գնաճը 2.2 տոկոս է կազմել է ( տես 1-ին գրաֆիկը):Նշենք, որ տարվա առաջին ամսվա ընթացքում՝ նախաամանորյա իրարանցումից հետո, գնորդական պահանջարկը նկատելիորեն նվազել էր: Դրա համար էլ հունվարին մանրածախ ապրանքաշրջանառության ծավալն ամենացածրն է օրացույցային տարում http://news.am/arm/news/247241.html : Այդ դեպքում ինչո՞ւ են հունվարին գներն աճում՝ չնայած գնորդական պահանջարկը կրճատվում է:

Ինչպես հայտնի է, վիճակագրական նպատակներով գների մոնիթորինգն իրականացվում է յուրաքանչյուր ամսվա 1-ին, 10-ին ու 20-ին: Այսինքն՝ նախաամանորյա օրերի ամենաբարձր նիշերը դեկտեմբերյան ցուցանիշում չեն արտացոլվում: Սակայն գնորդական պահանջարկի վերոնշյալ անկման պատճառով մասամբ նվազած գներն այնուամենայնիվ փոխադրվում են նաեւ հունվար ամիս: Դրանով էլ հենց կարելի է բացատրել այս ամսվա՝ առաջին հայացքից հակասական թվացող թանկացումը:

Երկարաժամկետ միտումները բացահայտելու համար ավելի լավ է դիտարկենք տարվա տվյալները: Տարեկան կտրվածքով հունվարի պատկերը ուղիղ հակառակն է՝  երկրում գրանցվել է 0.4 տոկոսի դեֆլյացիա (տես 2-րդ գրաֆիկը): Դա հիմնականում պայմանավորված է պարենամթերային դեֆլյացիայով, որը կազմել է 3.9 տոկոս:

Գների նման նվազումը դժվար է միանշանակ գնահատելը: Հայտնի է, որ չափազանց ցածր գնաճը, եւ առավել եւս դեֆլյացիան, կարող են բացասական հետեւանքներ ունենալ տնտեսության համար: Օրինակ մեր գյուղացիների համար, որոնց եկամուտները տնտեսվարությունից են ու առանց այդ էլ բարձր չեն: Հիշեցնենք, որ անցած տարի իրացված գյուղատնտեսական ապրանքների համար արտադրողների (այսինքն՝ գյուղացիների) գների գործակիցը նվազել էր գրեթե 20 տոկոսով: