Սիրիայի իրադարձությունները հետաքննող ՄԱԿ-ի անկախ հանձնաժողովի զեկույցի համաձայն, Սիրիայի գործող ղեկավարությունը, ահաբեկչական «Իսլամական պետություն» եւ «Ջաբհաթ ան-Նուսրա» կազմակերպությունները, ինչպես նաեւ մի քանի հակակառավարական խմբեր պատերազմական եւ մարդկության դեմ հանցագործություններ են կատարել:
Հրապարակված փաստաթղթում վերլուծվել է 2011-ի մարտի 10-ից մինչեւ 2015-ի նոյեմբերի 30-ը երկրում իրավիճակը: Զեկույցի հիմք է ծառայել 621 հարցազրույց, ինպես նաեւ փաստաթղթերի հսկայական քանակություն, տեղեկացնում է Gazeta-ն:
Զեկույցում հաղորդվում է, որ սիրիական կառավարությունը «մարդկության դեմ հանցագործություն է կատարել` ոչնչացումներ, սպանություններ, բռնաբարություններ, ինչպես նաեւ սեռական բռնության այլ ձեւեր, կտտանքներ, բանտարկություններ, բռնի անհետացումներ եւ այլ անմարդկային գործողություններ»: Զեկույցի տվյալների համաձայն, տասնյակ հազարավոր մարդիկ են բանտարկված սիրիական պաշտոնական իշխանությունների կողմից:
«Ջաբհաթ ան-Նուսրա» խմբավորումն Իդլիբում մեկուսարաններ է ստեղծել, որտեղ, պետական հանձնաժողովի տվյալներով, փաստագրել է բանտարկության ընթացքում բոլոր զոհվածներին: Տեղեկություններ կան, որ գրոհայինները կառավարական զորքի զինվորների են սպանել գերի վերցնելուց հետո: Որոշ ոչ կառավարական խմբեր եւ «Ջաբհաթ ան-Նուսրան» պատերազմական հանցանքներ են կատարել սպանությունների, դաժան վերաբերմունքի եւ կտտանքների տեսքով:
ԻՊ-ը կալանվածներին բանտային բռնության է ենթարկել, ներառյալ կտտանքները եւ զանգվածային մահապատիժները: Հաճախ մահապատժի դատավճիռ են կայացրել ոչ պաշտոնական դատարանները:
Նշվում է, որ ՍԱՀ-ի կառավարությունը հանձնաժողովներին եւ մարդու իրավունքներով զբաղվող այլ կազմակերպությունների մշտապես արգելել է հետաքննության համար մտնել Սիրիայի տարածք: Փաստաթղթում ընդգծվում է, որ խախտումների մասին հայտնի է եղել Սիրիայի իշխանությանը, բայց իշխանությունը ոչ մի կերպ չի արձագանքել տեղի ունեցածին: