2016թ. հունվարի 20-ին Արագածոտնի մարզի Աղձք գյուղում գտնվող աներոջ տնից դուրս եկած եւ անհետ կորած 40-ամյա Գարիկ Տերտերյանը դեռեւս չի հայտնաբերվել: Այս մասին NEWS.am-ին հայտնեց Աղձքի գյուղապետ Արսեն Ավդալյանը:
«Այն օրվանից, ինչ Գարիկը կնոջը եւ աղջկան բերել է աներոջ տուն եւ անհետացել նրանք այնտեղ են ապրում, ու՞ր գնան բա: Դեռ ոչ մի նորություն չկա, սպասում են»,-ասաց գյուղապետը:
Նշենք, որ Գարիկ Տերտերյանը Երեւանի բնակիչ է, տաքսու վարորդ, անհետացման օրը կնոջը եւ դստերը տարել է աներոջ տուն, ասել, որ պատվեր ունի, խոստացել վերադառնալ: Տերտերյանի մեքենան օրեր անց հայտնաբերել էին Էրեբունիի գազալցակայաններից մեկում:
Գյուղապետը NEWS.am-ի հետ զրույցում նշել էր, որ, ըստ խոսակցությունների, Տերտերյանը պարտքեր է ունեցել, եւ տարված է եղել խաղային ապարատներով:
Ավելի վաղ հայտնել էինք, որ 40-ամյա Գարիկ Տերտերյանը հունվարի 20-ին, ժամը 23:00-ի սահմաններում իր Daewoo Nexia մակնիշի 23 SU 401 համարանիշի ավտոմեքենայով դուրս է եկել Արագածոտնի մարզի Աղձք գյուղի տներից մեկից եւ անհետ կորել:
Տերտերյանի գտնվելու վայրի վերաբերյալ տեղեկություններ ունեցողները կարող են զանգահարել ոստիկանության Էրեբունու կամ մոտակա բաժին 010 45 02 02 կամ 1-02 հեռախոսահամարներով:
