Հոնկոնգում անկարգությունների ընթացքում առնվազն 48 մարդ է վիրավորվել, այդ թվում 4 լրագրող, հաղորդում է ՏԱՍՍ-ը: Բախումները տեղի են ունեցել այս գիշեր, Կոուլուն թերակղզու խիտ բնակեցված Մոնգկոկի շրջանում:
Հակամարտությունը բռնկվել է փողոցում ապօրինի կերպով սննդի առեւտրով զբաղվող առեւտրականների եւ Սննդամթերքի եւ շրջակա միջավայրի դեպարտամենտի տեսուչների միջեւ: Վաճառականներին պաշտպանել են անցորդներն ու «արմատական տարրերը»: Վերջիններս սկսել են իրավապահների ուղղությամբ քարեր ու շշեր նետել:
Ոստիկաններն սկզբում 2 նախազգուշական կրակոց են արձակել օդ, ապա գործի դրել ռետինե մահակները: Արդեն առավոտյան իրավապահներին հաջողվել է ցուցարարներից ազատել այդ շրջանը: Ձերբակալվել է ավելի քան 20 մարդ:
2014-ի աշնանը Մոնգկոկի շրջանում բախումներ էին տեղի ունեցել ոստիկանության եւ ժողովրդավարական ուժերի ակտիվիստների միջեւ: Հոնկոնգի ոստիկանության ներկայացուցիչը չէր բացառել, որ ներկա բախումները նույնպես «բեմադրված են»: