Ռուսաստանը Թուրքիայից պաշտոնական ներողության է սպասում, ինչպես նաեւ ակնկալում է, որ Սու-24-ը խոցելու մեղավորները կպատժվեն, իսկ հասցրած վնասն էլ կփոխհատուցվի։ Այս մասին հայտնել է Անկարայում ՌԴ դեսպան Անդրել Կառլովը, փոխանցում է «ՌԱԻ Նովոստի»-ն։
«Ռուսաստանի նախագահ Վլադիմիր Պուտինն ամենասկզբում ասել էր, թե ինչ պետք է անի Թուրքիան մեր հարաբերություններում այս խորը ճգնաժամը հաղթահարելու համար։ Մենք թուրքական կողմից պաշտոնական ներողության ենք սպասում եւ ակնկալում ենք, որ մեղավորները կպատժվեն, իսկ պետությանը հասցրած վնասն էլ կփոխհատուցվի»,- ասել է դեսպանը։
Նրա կարծիքով թուրքական կողմի այն հայտարարությունները, թե Թուրքիան ցավում է տեղի ունեցածի համար, բավական չեն։
Դեսպանը նշել է, որ Ռուսաստանի եւ Թուրքիայի հարաբերությունների կարգավորման այլ ուղի չի տեսնում, բացի այդ պայմանների կատարումը։
