Ռուսաստանը չի հրաժարվում «Թուրքական հոսք» գազատարից, սակայն դրա ճակատագիրը ռուս-թուրքական հարաբերությունների ճգնաժամի պայմաններում դժվար է կանխատեսել։ Այս մասին «ՌԻԱ Նովոստի»-ին հայտնել է Անկարայում ՌԴ դեսպան Անդրեյ Կառլովը։
«Ռուսաստանը չի հրաժարվում «Թուրքական հոսքից», բայց գնդակն այս դեպքում ավելի շատ Թուրքիայի դաշտում է։ Ներկայիս պայմաններում դժվար է կանխատեսել դրա հետագա ճակատագիրը, այդ պատճառով մենք առաջին հերթին սպասում ենք, որ թուրքական կողմը խելքի կգա եւ կանի այն, ինչ պետք է անի միջպետական հարաբերությունների կարգավորման համար»,- ասել է նա։
Կառլովը նաեւ հայտնել է, որ Ռուսաստանը նաեւ չի հրաժարվել Թուրքիայում «Աքքույու» ատոմակայանից։
«Թուրքիայի նկատմամաբ մեր բոլոր միջոցները պարզ են եւ թափանցիկ։ Ո՛չ նախագահի հրամանում, ո՛չ կառավարության որոշումներում «Ակկույու» ատոմակայանի մասին հիշատակումներ չկան։ Նախագիծը մեր կողմից չի չեղարկվել, բայց դրա իրականացման հեռանկարները կախված են թուրքական կողմից»,- ասել է դեսպանը։
