Հայաստանի հետ ասոցացման նախկին համաձայնագրի քաղաքական մասը կարելի է տեղափոխել նոր փաստաթուղթ։ Այս մասին փետրվարի 9-ին լրագրողներին ասել է Հայաստանում ԵՄ պատվիրակության ղեկավար Պյոտր Սվիտալսկին։
Նա հիշեցրել է, որ 2015թ. դեկտեմբերին Բրյուսելում բարեկամական եւ կառուցողական միջավայրում մեկնարկել են նոր փաստաթղթի շուրջ բանակցությունները։ Երկու կողմն էլ ցանկություն են հայտնել մոտ ժամանակներս փոխընդունելի արդյունքի հասնել։ ԵՄ պատվիրակության ղեկավարի խոսքով՝ նախկին փաստաթղթի մյուս բաժինները վերանայման կարիք ունեն։ Ակնհայտ է, որ խորը եւ համապարփակ ազատ առեւտրի մասին ռեժիմը հնարավոր չի լինի վերադարձնել՝ հաշվի առնելով ԵՏՄ-ի առաջ Հայաստանի ստանձնած պարտավորությունները։ «Այդուհանդերձ երկու կողմն էլ կարող են լավ հիմք դնել հետագայում եվրոպական բիզնեսը Հայաստան բերելու համար։ Դա լավ սկիզբ է համագործակցության համար եւ առհասարակ դրա վերջը չէ»,- ընդգծել է Սվիտալսկին։