Երեւանի Ազատության հրապարակում մարտի 1-ին հավաք եւ երթ անցկացնելու մասին քաղաքապետարանին իրազեկել են եւ «Հայ ազգային կոնգրեսը» եւ «Նոր Հայաստանը»:
Երեւանի քաղաքապետարանի կայքից տեղեկանում ենք, որ քաղաքապետի լիազոր ներկայացուցչի որոշմամբ ի գիտություն է ընդունվել «Հայ ազգային կոնգրես» կուսակցության գործադիր քարտուղար Ս. Աբրահամյանի իրազեկումը՝ մարտի 1-ին ժ.11.00-23.00 Ազատության հրապարակում հավաք և հավաքի ընթացքում՝ ժ.19.00-ին Ազատության հրապարակ–Մաշտոցի պողոտա–Գ.Լուսավորչի փողոց–Իտալիայի փողոց–Հանրապետության հրապարակ–Նալբանդյան փողոց–Թումանյան փողոց–Ազատության հրապարակ երթուղով երթ անցկացնելու վերաբերյալ։
«Նոր Հայաստանի» ներկայացրած հայտարարությունում սահմանվել է սահմանափակում. Վարուժան Ավետիսյանի կողմից մարտի 1-ին ժ.00.00-24.00 Ազատության հրապարակում նախատեսված հավաքի ժամանակի նկատմամբ՝ առաջարկելով հավաքն անցկացնել ժ.08.00-22.00։ Բացի դրանից, քաղաքապետարանը չի թույլատրել Ազատության հրապարակում նախատեսվող հավաքի ընթացքում վրաններ տեղադրել:
«Նոր Հայաստան»-ը մարտի 1-ին ժ.19.30-21.30 երթ կանցկացնի հետեւյալ ուղիով՝ Ազատության հրապարակ–Հյուսիսային պողոտա–Աբովյան փողոց–Հանրապետության հրապարակ–Ամիրյան փողոց–Մաշտոցի պողոտա–Ազատության հրապարակ: