Հայաստանում ընտրական օրենսգիրքը խախտողներին պետք է պատասխանատվության ենթարկել։ Այս մասին փետրվարի 9-ին լրագրողներին ասել է Հայաստանում ԵՄ պատվիրակության ղեկավար Պյոտր Սվիտալսկին։
Նրա խոսքով՝ անուշադրության մատնված խախտումները կարող են լրջորեն վնաս հասցնել Հայաստանի միջազգային հեղինակությանը։ Նա իշխանություններին կոչ է արել ուշադիր ուսումնասիրել դեկտեմբերի 6-ին կայացած սահմանադրական հանրաքվեի մասին ԵԱՀԿ/ԺՀՄԻԳ առաքելության զեկույցը։ Նրանում պարզ նշված են ընտրական համակարգի թույլ կողմերը՝ վիճելի ընտրացուցակներ եւ քվեարկության ու ձայների հաշվարկի ժամանակ գրանցված միջադեպեր։ Դիտորդներն իրենց աչքերով են տեսել, թե ինչպես են կանոնները խախտելով խոտան որակվել քվեաթերթիկները։ Իրավախախտներին չի կանգնեցրել անգամ միջազգային դիտորդների ներկայությունը։ «Հայաստանի իշխանությունն ու ընդդիմությունը պետք է լուրջ ընդունեն մշտադիտարկման առաքելության եզրակացությունները։ Նոր Ընտրական օրենսգիրքը լակմուսի թուղթ կդառնա այդ բարեփոխումների համար եւ թույլ կտա տեսնել, թե որ ուղղությամբ է գնում երկիրը դրանից հետո»,- նշել է Սվիտալսկին։