Փետրվարի 9-ին Ամենայն հայոց կաթողիկոս Գարեգին Բ-ն Մայր Աթոռ Սուրբ Էջմիածնում ընդունել է Սերբիայի խորհրդարանի նախագահ Մայա Գոյկովիչի գլխավորած պատվիրակությանը` ուղեկցությամբ ՀՀ ԱԺ նախագահի տեղակալ Էդուարդ Շարմազանովի:
Ամենայն Հայոց Կաթողիկոսը, ողջունելով հյուրերին, գոհունակությամբ նշել է, որ պետական բարձր մակարդակով փոխայցելությունների շնորհիվ երկու ժողովուրդների բարեկամական հարաբերություններն առավել սերտանում են: Նա անդրադարձել է դեռեւս վաղ միջնադարից Սերբիայում հաստատված հայ համայնքին եւ հայ-սերբական պատմական կապերին:
Այս առիթով Ամենայն Հայոց Կաթողիկոսն ի դեմս Սերբիայի խորհրդարանի նախագահի մասնավոր իր գնահատանքն է բերել սերբ ժողովրդին` 1988 թ. աղետալի երկրաշարժի ժամանակ Հայաստանին ցուցաբերած աջակցության համար
Վեհափառ Հայրապետը նաեւ անդրադարձել է Հայաստանեայց Առաքելական եւ Սերբ Ուղղափառ Եկեղեցիների միջեւ առկա ջերմ հարաբերություններին եւ համագործակցությանը:
Իր հերթին տիկին Մայա Գոյկովիչը խոսել է երկու ժողովուրդների պատմական անցյալի եւ երկու երկրների ներկայիս գործակցության մասին: Նա նաեւ կարեւորել է երկու Եկեղեցիների միջեկեղեցական հարաբերությունները` ընդգծելով, որ Եկեղեցին կարեւոր դերակատարություն ունի հասարակության կյանքում:
Զրույցի ընթացքում խոսվել է նաեւ երկրների առջեւ ծառացած մարտահրավերների եւ դրանց հաղթահարման գործում Եկեղեցիների բերած զորակցության մասին: Այս կապակցությամբ Վեհափառ Հայրապետը հաստատել է, որ քրիստոնեական միեւնույն արժեքներ դավանող հայ եւ սերբ ժողովուրդները դարերի ընթացքում հույսով ու հավատքով են վերապրել բոլոր փորձությունները եւ լավատեսության ոգով իրականացրել իրենց իղձերն ու նվիրական երազանքները:
Ամենայն Հայոց Կաթողիկոսը նաեւ եղբայրական իր ողջույններն է փոխանցել Սերբիայի Ուղղափառ Եկեղեցու Պատրիարք Իրինեոսին:
