Եվրահանձնաժողովը գազամատակարարման ոլորտում 14 առաջնային նախագծեր է ընտրել, որոնց զարգացումը կօգնի հաղթահարել ռուսական գազից ունեցած կախումը, գրում է Spiegel–ը՝ վկայակոչելով գերատեսչությունում իր աղբյուրը:
Խոսքը ընդհանուր ենթակառուցվածքի կենտրոնական նախագծերի զարգացման մասին է, որոնց միջոցով ԵՄ ցանկացած պետություն կկարողանա գազ ստանալ բազմաթիվ երկրներից: Ընդհանուր շահերից բխող այս նախաձեռնությունը փետրվարի 10-ին կներկայացնի էներգետիկայի հարցերով եվրահանձնակատար Միգել Արիասե Կանյետեն:
ԵՀ առաջնային նախագծերից են Խորվաթիայիում հեղուկացված բնական գազի տերմինալի՝ այդ թվում Հունգարիայի ուղղությամբ խողովակաշարի շինարարության ավարտը, մի քանի քանի այլ խողովակաշարերի շինարարությունը, որոնք Ֆինլանդիային ու Բալթյան երկրներին ավելի շատ կկապեն ԵՄ մնացած երկրների գազային ցանցին, նաեւ Ռումինիայում, Բուլղարիայում ու Հունաստանում խողովակաշարային ցանցի ընդլայնումը:
Այդ նախագծերի իրականացման համար Եվրամիությունը պետք է միջոցներ հատկացնի: Ինչպես հետեւում է Եվրահանձնաժողովի նախաձեռնությունից, տվյալ նախագծերը պետք է նպաստեն ԵՄ գազի շուկայում էներգետիկ անվտանգության ու մրցակցության ապահովմանը: Եվրահանձնաժողովը հայտնել է, որ մտադիր է ապագայում ստուգել էներգետիկայի ոլորտում միջկառավարական համաձայնագրերն ու մատակարարումների մասին պայմանագրերը:
Հոդվածում նշված է, որ Ռուսաստանն առայսօր Եվրոպայի համար շարունակում է մնալ գազի ամենախոշոր մատակարարը՝ զբաղեցնելով շուկայի գրեթե 40 տոկոսը, հայտնում է Gazeta-ն:
