Ժամկետային զինծառայող 19-ամյա Ազիզ Բաքոյանը ինքնակամ լքել է Տավուշի մարզի Դիլիջան քաղաքում տեղակայված զորամասերից մեկը: Այս մասին NEWS.am-ին հայտնեց ՀՀ Պաշտպանության նախարարի խոսնակ Արծրուն Հովհաննիսյանը՝ անդրադառնալով մեր խմբագրություն ահազանգած Բաքոյանների պնդումներին, թե իրենց որդին փետրվարի 6-ից անհետացել է:
«Ոչ թե անհետացել է, այլ փախել է, ճիշտ կլինի ասել՝ ինքնակամ լքել է զորամասը»,-ասաց ՊՆ խոսնակը:
Արծրուն Հովհաննիսյանի խոսքով՝ Ազիզ Բաքոյանի՝ զորամասը ինքնակամ լքելուց 3 ժամ անց ռազմական ոստիկանության համապատասխան ստորաբաժանումները անցել են որոնողական աշխատանքներին, սակայն մինչ օրս նա չի հայտնաբերվել:
NEWS.am-ի հետ զրույցում, սակայն, Բաքոյանները մտահոգություն են հայտնել, թե, ամենայն հավանականությամբ, իրենց որդին սպանվել է, եւ այդ մասին իրենց չեն հայտնել:
Արծրուն Հովհաննիսյանը հորդորեց Բաքոյաններին շտապողականություն չդրսեւորել եւ սպասել որոնողական աշխատանքների արդյուnքներին:
«Հարազատների մտքով ամեն ինչ կարող է անցնել, բայց պետք է սպասել, համապատասխան օպերացիան իրականցվում է»,-ասաց ՊՆ խոսնակը:
Նշենք, որ այսօր՝ փետրվարի 9-ին, NEWS.am-ի խմբագրություն ահազանգած Բաքոյանները հայտնել էին, որ իրենց որդին՝ 19-ամյա Ազիզ Բաքոյանը, փետրվարի 6-ին՝ առավոտյան 10.30-ից բացակայել է զորամասից: Արդեն 4-րդ օրն է` նրան փնտրում են: