Վրաստանի փոխարտգործնախարար Դավիթ Ջալաղանիան հանդիպել է Վրաստանում Իրանի դեսպան Թալեբի Ֆարիին:
Վրաստանի ԱԳՆ-ի տեղեկության համաձայն, հանդիպման հիմնական նպատակը իրանական կողմին պաշտոնապես տեղեկացնելն էր Վրաստանի կառավարության որոշմանը, որով փետրվարի 15-ից Իրանի քաղաքացիների համար չեղյալ է համարվում վիզային ռեժիմը: Երկրների միջեւ վիզային ռեժիմը մտցվել էր 2013-ի հուլիսի 1-ին:
Իրանական կողմին հանձնվել է Վրաստանի ԱԳՆ-ի համապատասխան պաշտոնական նոտան: Տվյալ որոշմամբ Իրանի քաղաքացիները, որոնք սովորական անձնագրեր ունեն, կարող են օգտվել Վրաստանում 45 օր առանց վիզայի մնալու իրավունքից, տեղեկացնում է «Գրուզիա On-line»-ը:
Հանդիպման շրջանակում կողմերը քննարկել են նաեւ երկկողմ հարաբերությունների այժմեական հարցեր, ինչպես նաեւ զբոսաշրջության, տնտեսության, առեւտրի եւ տարանցման ոլորտներում համագործակցության հեռանկարներ: