ՄԻՊ-ի՝ իշխանության թեկնածու Արման Թաթոյանը համոզված է, որ հաջողության հասնելու համար իրեն մեծապես կօգնի Մարդու իրավունքների պաշտպանի գրասենյակում եւ արդարադատության նախարարությունում ձեռք բերած փորձը:

«Մարդու իրավունքների պաշտպանի գրասենյակում աշխատել եմ հենց ստեղծման օրերին եւ հենց այն բաժնում, որը զբաղվել է փակ հաստատություններ մոնիթորինգային այցելություններով, եւ այն բողոքների քննարկմամբ, որոնք առնչվել են քրեական ողջ հետապնդման գործընթացին, առաջին հերթին քրեակատարողական հիմնարկներում»,- NEWS.am-ի թղթակցի հետ զրույցում ասաց ՄԻՊ թեկնածու, արդարադատության փոխնախարար Արման Թաթոյանը՝ նշելով, որ այդ բաժնում աշխատել է երեք տարուց ավելի:

Արման Թաթոյանի խոսքով՝ ինքն այնուհետեւ ղեկավարել է զեկույցների, արտահերթ հրապարակային զեկույցների մասնագիտական աշխատանքային խմբեր. «Մասնավորապես ղեկավարում էի խումբը, երբ հրապարակվեց ՄԻՊ արտահերթ հրապարակային զեկույցը՝ դատապարտյալների իրավունքների ապահովման հետ կապված: Մշտապես մասնակցել եմ տարեկան զեկույցների կազմման աշխատանքներին, վերլուծություններ եմ ներկայացրել»:

ՄԻՊ թեկնածուն համոզված է, որ արդարադատության նախարարությունում անցկացրած այս երկու տարիներն էլ իրեն օգնել են՝ առկա խնդիրներին արդեն ներսից հասկանալու համար: «Պետական աշխատանքը հնարավորություն է տվել ինձ հասկանալու՝ ինչպիսի քայլեր ձեռնարկել իրավունքների պաշտպանության ոլորտում արդյունքի հասնելու համար»:

Արման Թաթոյանի խոսքով՝ ինքն այս տարիներին նաեւ շատ կարեւոր բարեփոխումների է մասնակցել, մասնավորապես խոշտանգումների կանխարգելման ոլորտում. «Խոշտանգման հանցակազմը համապատասխանեցվեց միջազգային չափանիշներին: Խոշտանգման համար քրեական հետապնդումը մասնավորից վերածվեց հանրայինի»:

Նշենք, որ ՄԻՊ-ի թեկնածուներն են Արման Թաթոյանը, որին առաջադրել է ԱԺ ՀՀԿ խմբակցությունը, Զարուհի Փոստանջյանը, որին առաջադրել է Էդմոն Մարուքյանը: ՀՅԴ-ն, ՕԵԿ-ը եւ ՀԱԿ-ը թեկնածու չեն առաջադրել։ ՕԵԿ-ը պաշտպանում է Զարուհի Փոստանջյանի թեկնածությունը։