Հարավային ռազմական օկրուգի զորքերում ու Ռուսաստանի օդադեսանտային զորքերի ու ռազմատրանսպորտային ավիացիայի առանձին միավորումներում անսպասելի ստուգումը Անկարային ուղղված ազդանշան է : Այս մասին NEWS.am-ի թղթակցի հետ զրույցում ասել է ռուսաստանցի ռազմական փորձագետ Վլադիմիր Եվսեեւը :
Նրա խոսքով, դա զորքերի մարտունակությունը ստուգելու բնական հնարավորություն է : «Մի կողմից այստեղ ասես ոչ մի արտասովոր բան չկա: Մյուս կողմից էլ՝ երբ Թուրքիան իր զորքերը կենտրոնացրել է թուրք- սիրիական սահմանի երկայքով, նմանատեսակ զորավարժությունները դառնում են յուրատեսակ ուղերձ Անկարային այն մասին, որ Ռուսաստանը պատրաստ է իր զինված ուժերը լիարժեք օգտագործել Ռուսաստանի դաշնության անվտանգությունն ապահովելու համար : Ես կարծում եմ, որ այդ ուղերձը կլսվի»,- նշել է Եվսեեւը, շեշտելով, որ դա ազդանշան է Թուրքիայի համար, որպեսզի վերջինս զերծ մնա չմտածված գործողություններից:
Փորձագետը նշեց, որ Գյումրիում տեղակայված է ռուսական 102-րդ ռազմակայանը նույնպես բերվում է մարտունակ վիճակի : «Մարտունակության առումով, ըստ երեւույթին, այն մշակում է հայ- թուրքական սահմանը պաշտպանելու հնարավորությունը: Հայաստանը պետք է վստահ լինի, որ Ռուսաստանն իր դաշնակցային պարտավորություններին համաձայն՝ անհրաժեշտության դեպքում կապահովի Հայաստանի հանրապետության անվտանգությունը, այդ թվում լրացուցիչ զորքեր տեղակայելու միջոցով»,- ամփոփեց Վլադիմիր Եվսեեւը :
Հիշեցնենք, որ Ռուսաստանի պաշտպանության նախարար Սերգեյ Շոյգուն փետրվարի 8-ին հայտնել էր, որ Հարավային ռազմական օկրուգի զորքերում ու ՌԴ օդադեսանտային զորքերի ու ռազմատրանսպորտային ավիացիայի առանձին միավորումներում սկսվել է մարտունակության անսպասելի ստուգում : Գյումրիում 102-րդ ռուսական ռազմակայանը նույնպես Հարավային ռազմական օկրուգի մասն է կազմում: