Ռուսաստանի Ստավրոպոլի երկրամասի Գեորգիեւսկ քաղաքում բողոքի ակցիա է տեղի ունեցել։ Ցույցի ավելի քան 100 մասնակիցները պահանջել են օբյեկտիվ հետաքննություն վարել տեղաբնակ բազմազավակ մայր Լուսինե Առուստամյանի դաժան սպանության գործով։
Նախնական տեղեկություններով՝ Ինոզեմցովո ավանի 41-ամյա բնակչուհուն սպանել էին ամանորյա տոներից առաջ։ 3 երեխաների մոր սպանության մեջ կասկածում են կնոջ պարտապանին, որը «Լիրա» շուկայում առեւտրով զբաղվող գործարար մի կին է։ Հետաքննության տեղեկություններով՝ սպանված հայուհին Գեորգիեւսկ էր եկել՝ 40-ամյա գործընկերուհուց իր պարտքը պահանջելու համար։ Նրանք հանդիպել էին պարտապանի քրոջ տանը, ով շրջանային պոլիկլինիկայում ղեկավար պաշտոն է զբաղեցնում։ Կանանց մեջ վեճ էր ծագել, պարտապանը դանակահարել էր պարտատիրոջը, մասնատել մարմինը եւ դնելով պայուսակի մեջ՝ նետել Պոդկումոկ գետը, փոխանցում է «ՄԿ Կավկազ»-ը։
Սկզբում իրավապահները երկու քույրերին ձերբակալել էին, սակայն հետո ազատ էին արձակել։ Այս պահին կինը գործով անցնում է որպես վկա։ Բողոքի ցույցը կազմակերպվել է անաչառության կոչ անելու նպատակով, քանի որ տեղաբնակները մտահոգված են, որ բժիշկը կարող է խուսափել պատասխանատվությունից։
Ցույցի կազմակերպիչը՝ ընտանիքի ծանոթ Ալեքսանդր Բոնդարենկոն, եւ սպանվածի ամուսինը՝ Արմեն Հայրապետյանը, իրավապահներին կոչ են արել անկողմնակալ հետաքննություն անցկացնել։
