ՀՀ կառավարությունը մեկ-երկու ամսվա ընթացքում պատրաստվում է ընդունել Արարատյան դաշտի ստորգետնյա ջրերի կառավարման պլանը։ Այս մասին փետրվարի 10-ին՝ Արարատյան դաշտի ստորգետնյա ջրերի կառավարման վերաբերյալ USAID ծրագրի (ASPIRED) ներկայացման ժամանակ, ասել է Հայաստանի բնապահպանության փոխնախարար Սիմոն Պապյանը։
Նա նշել է, որ խորհրդարանն ավելի վաղ ընդունել է ստորգետնյա ջրերի օգտագործման սակագնի բարձրացումը, իսկ 2015թ. դեկտեմբերին ուժի մեջ է մտել Ջրային օրենսգրքում օրինագծերի փաթեթը։ «Բնապահպանության նախարարության մշտադիտարկման արդյունքներն արդեն դրական արդյունք են ցույց տալիս։ Արարատյան դաշտի ստորգետնյա ջրերի հորիզոնը վերականգնվում է։ Հիմա շատ կարեւոր է այդ ջրերի ավազանի հիդրոերկրաբանական անալիզ անցկացնել։ եվ կառավարման պլանը հնարավոր կլինի կառուցել մեր ունեցած եւ ASPIRED ծրագրի ընթացքում ստացած շատ կարեւոր տվյալների հիման վրա»,- ասել է Պապյանը։
