Գերմանական ավտոմոբիլային Daimler ընկերությունը պատրաստվում է Ամերիկայի շուկայից հետ կանչել իր մեքենաներից մոտ 841 հազարը: Լայնածավալ արձագանքի պատճառը մեքենաներում հայտնաբերված անսարքությունն է: Այն վերաբերում է անվտանգության բարձիկներին, որոնք սխալ են գործում: Նշենք, որ կոնցերնի մեքենաների մեջ ներկառուցված անվտանգության բարձիկներն արտադրվել են ճապոնական Takata ընկերության կողմից:
Գերմանական ավտոարտադրողի ներկայացուցիչները պատմել են, որ անվտանգության բարձիկների խնդիրն այն է, որ ՃՏՊ-ի դեպքում դրանք կարող են սխալ գործել: Այդ պատճառով մեքենայի վարորդները եւ ուղեւորները կարող են զոհ գնալ մետաղական տարրերին, որոնք թռչում են բարձիկների ակտիվացման դեպքում, տեղեկացնում է Planet- today-ը:
Նշենք, որ հետկանչը մեծ մասամբ վերաբերում է մարդատար մեքենաներին. 705 հազար նման մեքենա հետ կկանչվի: Կվերացվեն նաեւ 136 մինիվենի թերությունները: Իմիջիայլոց, մայիսին Takata-ն համաձայնել է, որ ամերիկյան շուկաներին մատակարարված մեքենաների հսկայական մասը զինված է եղել անվտանգության անսարք բարձիկներով:
Այսպես, ավելի վաղ Mazda-ն եւս նույն անսարքության պատճառով հետ էր կանչել իր մեքենաներից 374 հազարը: Անցյալ տարի մեքենաներում անսարքություններ էր շտկում նաեւ Toyota-ն:
