Հայաստանը ոչ մի այլ երկրի հետ դիվանագիտական հարաբերությունների նման մակարդակ չունի, ինչպես Ռուսաստանի հետ։ Այս մասին փետրվարի 10-ին Դիվանագետի օրվա կապակցությամբ ասել է Հայաստանում ՌԴ դեսպան Իվան Վոլինկինը։
Պատասխանելով հայ-ռուսական դիվանագիտական հարաբերությունների ներկայիս մակարդակի մասին NEWS.am-ի թղթակցի հարցին՝ դեսպանը նշել է. «Դիվանագիտական հարաբերությունները զարգանում են բոլոր ուղղություններով։ Դուք գիտեք, որ ամեն տարի մեր երկրների նախագահները մի քանի անգամ հանդիպում են՝ չհաշված արտգործնախարարների հանդիպումները։ Նրանք տարվա ընթացքում հանդիպում են առնվազն 10 անգամ՝ քննարկելով միջազգային խնդիրներն ու երկկողմ օրակարգային հարցերը»։
