Երեւանի Պռոշյան փողոցի 39 տան բնակիչները, որտեղ այսօր՝ փետրվարի 10-ի գիշերը հրդեհ է բռնկվել, դեռ չգիտեն, թե ինչից կարող էր այն առաջացած լինել, քանի որ այդ պահին քնած են եղել: Այս մասին NEWS.am-ի հետ զրույցում ասաց տան բնակիչներից 22-ամյա Գեւորգ Քոչարյանը: Նրա խոսքով, տանը բնակվում են ինքն ու իր պապիկը, հրդեհի պահին ինքը գտնվել է տան երկրորդ հարկում, իսկ նրա պապիկը՝ առաջին, որտեղից էլ սկսվել է հրդեհը (ֆոտոռեպորտաժ):
«Դեռ չենք հասկանում, թե ինչից է առաջացել հրդեհը: Այդ պահին ես երկրորդ հարկում էի քնած, կարողացա դուրս գալ, իսկ պապիկիս դուրս բերեցին փրկարարները: Քանի որ շատ ծուխ էր շնչել, տեղափոխեցինք հիվանդանոց, բայց իրեն լավ է զգում, ինքնակամ տուն է եկել»,-ասաց նա:
Ավելի վաղ տեղեկացրել էինք, որ այսօր՝ փետրվարի 10-ին, ՀՀ ՏԿԱԻՆ ահազանգ է ստացվել, որ Երեւանի Պռոշյան փողոցի տներից մեկում հրդեհ է բռնկվել:
Այրվել են տան խոհանոցը, սանհանգույցը՝ գույքով (մոտ 6 քմ) եւ մասամբ հյուրասենյակի կախովի առաստաղը (մոտ 4 քմ):